తెలుగు చిత్ర పరిశ్రమలో తనదైన కామెడీ టైమింగ్, సహజమైన నటనతో తక్కువ కాలంలోనే “మినిమమ్ గ్యారెంటీ హీరో”గా గుర్తింపు తెచ్చుకున్న హీరో నవీన్ పొలిశెట్టి ఇప్పుడు మరో క్రేజీ ప్రాజెక్ట్తో ప్రేక్షకుల ముందుకు రానున్నారు. ‘ఏజెంట్ సాయి శ్రీనివాస ఆత్రేయ’, ‘జాతిరత్నాలు’, ‘మిస్ శెట్టి మిస్టర్ పోలిశెట్టి’ వంటి వరుస హిట్లతో బాక్సాఫీస్ వద్ద ప్రత్యేకమైన ఇమేజ్ సొంతం చేసుకున్న నవీన్… తాజాగా టాలీవుడ్ అగ్ర నిర్మాణ సంస్థ మైత్రీ మూవీ మేకర్స్తో చేతులు కలపడం ఇండస్ట్రీలో హాట్ టాపిక్గా మారింది.
భారీ సినిమాలకు కేరాఫ్ అడ్రస్గా నిలిచిన మైత్రీ మూవీ మేకర్స్ సంస్థ, తొలిసారిగా నవీన్ పొలిశెట్టితో సినిమా తెరకెక్కించేందుకు సిద్ధమవుతోంది. సాధారణంగా స్టార్ హీరోలతో పాన్ ఇండియా స్థాయి ప్రాజెక్టులను నిర్మించే ఈ సంస్థ… నవీన్లోని వినోదాత్మక టాలెంట్ను దృష్టిలో పెట్టుకుని ఓ వైవిధ్యమైన కథను ఎంపిక చేసినట్లు సమాచారం. నిర్మాతలు నవీన్ యెర్నేని, రవిశంకర్ ఇప్పటికే కథా చర్చలు పూర్తి చేసి ప్రాజెక్ట్ను ఫైనల్ చేసినట్లు టాక్ వినిపిస్తోంది.
ఇక ఈ సినిమాతో ఓ తమిళ యువ దర్శకుడు టాలీవుడ్కు పరిచయం కాబోతుండటం మరో విశేషం. అతడు సిద్ధం చేసిన కథ నవీన్ స్టైల్కు పూర్తిగా సరిపోతుందని, ముఖ్యంగా కామెడీతో పాటు ఫ్రెష్ ఎంటర్టైన్మెంట్ ఉండటంతో హీరో వెంటనే గ్రీన్ సిగ్నల్ ఇచ్చినట్లు తెలుస్తోంది. తమిళ మేకింగ్ స్టైల్కు నవీన్ నేటివిటీ కామెడీ జతకలిస్తే ఈ సినిమా కొత్త అనుభూతిని అందిస్తుందని సినీ వర్గాలు అభిప్రాయపడుతున్నాయి.
ప్రస్తుతం స్క్రిప్ట్ పనులు చివరి దశలో ఉన్నాయని, త్వరలోనే నటీనటులు, టెక్నికల్ టీమ్కు సంబంధించిన వివరాలను అధికారికంగా ప్రకటించనున్నారని సమాచారం. వరుస విజయాలతో ఫుల్ ఫామ్లో ఉన్న నవీన్ పొలిశెట్టి… మైత్రీ మూవీ మేకర్స్ వంటి భారీ బ్యానర్తో కలిసి మరో బ్లాక్బస్టర్ అందుకోవడం ఖాయమని అభిమానులు సోషల్ మీడియాలో పోస్టులు చేస్తున్నారు. ఇక ఈ సినిమాకు సంబంధించిన టైటిల్, ఫస్ట్ లుక్ మరియు ఇతర అప్డేట్స్ కోసం ఫ్యాన్స్ ఎంతో ఆసక్తిగా ఎదురుచూస్తున్నారు.
