బాలకృష్ణ–బోయపాటి శ్రీను కాంబినేషన్లో రూపుదిద్దుకుంటున్న భారీ యాక్షన్ ఎంటర్టైనర్ ‘అఖండ 2: తండవం’ ఈ సంవత్సరం డిసెంబర్ 5, 2025న ప్రపంచవ్యాప్తంగా విడుదల కావడానికి సిద్ధమవుతోంది. ట్రైలర్ విడుదలైన తర్వాత సినిమాపై అంచనాలు భారీగా పెరిగి, ప్రేక్షకుల్లో మరింత క్రేజ్ నెలకొంది. బోయపాటి స్టైల్ మాస్ ట్రీట్మెంట్, బాలయ్య పవర్ఫుల్ లుక్ ఈ సీక్వెల్పై హైప్ను అమాంతం పెంచాయి. ఈసారి సినిమాను 3D ఫార్మాట్లో కూడా తయారు చేసినట్లు టీమ్ ప్రకటించింది.
అయితే, యూఎస్ఏలో ఉన్న 3D అభిమానులకు కొంత నిరాశ ఎదురైంది. అమెరికాలో ప్రీమియర్ షోల కోసం ఈ 3D వెర్షన్ అందుబాటులో ఉండదని డిస్ట్రిబ్యూటర్ తెలిపాడు. యూఎస్ఏలో ప్రీమియర్లు కేవలం 2D వెర్షన్లోనే జరుగుతాయి. 3D వెర్షన్ మాత్రం ప్రీమియర్ తర్వాత రోజు నుంచి మాత్రమే థియేటర్లలో కనిపించనుంది. దీంతో అక్కడి బాలయ్య అభిమానులు తమ ప్రణాళికలను మార్చుకోవాల్సిన పరిస్థితి వచ్చింది.
ఇటీవల కర్ణాటకలోని చిక్కబళ్లాపురలో అఖండ 2 ట్రైలర్ను ఘనంగా విడుదల చేశారు. ట్రైలర్లో బాలయ్య చెప్పిన డైలాగ్ “ఇప్పటి వరకూ మా దేశ రూపాన్ని చూసావ్… మా దేశ విశ్వరూపాన్ని చూడలేదు” సోషల్ మీడియాలో ట్రెండ్ అవుతోంది. సనాతన ధర్మం నేపథ్యంలో సాగుతున్న కథలో ఈసారి కూడా బోయపాటి అదే థీమ్ను బలంగా ప్రతిబింబిస్తున్నట్లు తెలుస్తోంది. తమన్ అందించిన బ్యాక్గ్రౌండ్ స్కోర్, హై ఆక్షన్ సీన్స్, గ్రాండ్ విజువల్స్ ఈ సినిమా అంచనాలను మరింత పెంచాయి.
